सोशल मीडियावर हिरोपंती करणे पडले महागात

विवेक तोटेवार, वणी: राजूर (इजारा) येथील युवकाला तलवारीसह फोटो टाकून हिरोगिरी करणे चांगलेच महागात पडले. त्याने तलवारीसह फोटो सोशल मीडियात पोस्ट केला होता. याची माहिती मिळताच शनिवार 9 मार्च रोजी सकाळी 10 वाजता त्याला स्थानिक गुन्हे शाखेने अटक केली. सुमित भास्कर खोके (24) रा. राजूर इजारा असे आरोपीचे नाव आहे. त्याने सोशल मीडियावर पोस्ट केलेला तलवारी घेतलेला फोटो व्हायरल झाला होता. याची माहिती एलसीबीला यवतमाळ यांना मिळाली. त्यांनी त्वरित कारवाई करीत सुमित याच्या राहत्या घरी तपासणी केली. त्याच्या घरात त्यांना तलवार आढळून आली. पोउपनी रामेश्वर कांडूरे यांच्या फिर्यादीवरून सुमित याच्यावर आर्म ऍक्टच्या कलम 4, 5 नुसार गुन्हा नोंदवण्यात आला. पुढील कारवाई वणी पोलीस करीत आहे.