मारेगाव पंचायत समितीने केले शिक्षिकेचे परस्पर समायोजन

गेल्या आठवड्यात जिल्हा परिषदेच्या सभागृहात अतिरिक्त ठरलेल्या शिक्षकांचं समायोजन करण्यात आलं. त्यात वणी पंचायत समितीचा आक्षेप असल्यानं त्याचं शुक्रवारी समायोजन करण्यात आलं. समायोजन करतांना स्थानिक पंचायत समिती शिक्षण विभागानं रिक्त गावांची यादी देणं गरजेचं होतं. पण मारेगाव पंचायत समितीच्या गटशिक्षणाधिकारी रिक्त गावे न दाखविता समायोजनाला उपस्थित झाले. सभागृहातच रिक्त गावांची माहीती सादर करण्यात आली. त्यात तालुक्यातील वरूड शाळा रिक्त असल्याची कुठेही नोंद नव्हती. परिणामी या शाळेवर कोणत्याही शिक्षकांचे समायोजन करण्यात आले नाही.

जिल्हा स्तरावरून करण्यात आलेल्या समायोजनात केवळ तीन शाळा रिक्त राहील्या होत्या. तर उर्वरित शिक्षकांचे समायोजन करण्यात आले होते. जिल्हा स्तरावरून टोकाच्या गावाला समायोजन झाल्यानंतर येथील गटशिक्षणाधिका-यांनी रिक्त गाव दाखविले नसतांना कुटुंबातीलच व्यक्तीला जवळच्या गावात समायोजन करून नियुक्ती दिल्याची चर्चा सध्या शिक्षकांमध्ये रंगली आहे.

(शिक्षकांच्या मागणीसाठी भरवली बिडीओंच्या कक्षातच शाळा)