बाहुबली स्टंटनं घेतला तरुणाचा बळी, शहापूर धबधब्यावरची घटना

मुंबई: शहापूर येथील माहुली धबधब्याजवळ ‘बाहुबली’ स्टाईल स्टंटबाजी करुन धबधब्यात उडी घेणं एका तरुणाच्या जीवावर बेतलं आहे. बाहुबली सिनेमात प्रभासनं जशी धबधब्यावरून उडी मारली, तशी उडी मारण्याच्या प्रयत्न एका तरुणानं केला होता. मात्र त्याला यात जीव गमवावा लागला आहे. धक्कादायक म्हणजे हा सर्व प्रकार मोबाईलमध्ये शुट झाला आहे.

सविस्तर वृत्त असे की, मुंबईच्या भिवंडीतील इंद्रपाल पाटील(२७) हा तरुण १४ जुलै रोजी आपल्या मित्रमंडळींसोबत पावसाळी पिकनिकसाठी माहुली धबधब्यावर गेला होता. यावेळी धबधब्यावर ‘बाहुबली’ सिनेमासारखी खतरनाक स्टंटबाजी करण्याच्या प्रयत्नात त्याने धो धो कोसळणाऱ्या धबधब्यात उडी मारली आणि इंद्रपालचा यात जीव गेला.

पोलिसांनी दिलेल्या माहितीनुसार गेल्या दोन आठवड्यात घडलेली ही दुसरी घटना आहे. याआधी अशाच प्रकारे याच धबधब्यात उडी मारल्याने एका तरुणाचा मृत्यू झाला होता. त्यानंतर पोलिसांकडून येथे जमणाऱ्या पर्यटकांना वारंवार सावधानतेच्या सुचना देखील देण्यात येत होत्या. तरीही अतिउत्साहामुळे इंद्रपाल याला स्टंटबाजी करणं महागात पडलं आहे.

दरम्यान, इंद्रपालचा भाऊ महेंद्र याने यामागे घातपाताचा संशय व्यक्त केला आहे. इंद्रपाल याला जाणूनबुजून धक्का मारुन धबधब्यात पाडण्यात आल्याचा आरोप त्याने केला आहे. मात्र, इंद्रपालने स्वत:हून उडी मारल्याची माहिती प्रत्यक्षदर्शींनी दिल्याचं पोलिसांचं म्हणणं आहे.

‘माहुली धबधब्यावर घडलेली ही काही पहिली घटना नाही. गेल्या दोन आठवड्यात अशा दोन घटनांची नोंद झाली आहे. पावसाळ्यात याठिकाणी पर्यटकांची गर्दी होते. आमच्याकडून वारंवार सुचना देऊनही पर्यटक नियमांच पालन करत नाहीत. याबाबत याआधीच वनविभागालाही येथील गेट बंद करण्याबाबतच पत्र लिहिण्यात आलं होतं’, असं शहापूर पोलीस ठाण्याचे वरिष्ठ पोलीस अधिकारी महेश शेट्ये यांनी सांगितलं.