विलास ताजने, वणी : दगडी खाणीच्या खड्ड्यात बैलबंडी पडून शेतगड्यासह बैलाचा मृत्यू झाल्याची घटना मोहदा येथे दि.१८ मंगळवारी दुपारच्या सुमारास घडली. राहुल रामाजी मेश्राम वय ३२ रा. सुकनेगाव असे मृतकाचे नाव आहे. मोहदा येथील शेतकरी शंकर ढुमने यांच्याकडे तो शेतगडी म्हणून चाकरी करीत होता.
ढुमणे यांचे डोर्ली शिवारात शेत आहे. सदर शेतातुन येत असताना बैलबंडी खोल पाणी भरलेल्या खड्ड्यात पडली. सदर दगडी खाण वणीच्या पाराशर यांच्या मालकीची असल्याचे समजते. सदर परिसरात दगड वाहुन नेणाऱ्या ट्रकची ये-जा सुरू असते. दगड वाहून नेणाऱ्या ट्रकला बैल बुजाडल्यामुळे सदर घटना घडल्याची गावात चर्चा आहे. या घटनेत एक बैल वाचला आहे.