जितेंद्र कोठारी, वणी : तालुक्यातील प्रसिध्द आणि जागृत असलेले देवस्थानाच्या विकासासाठी तब्बल 5 कोटी रुपये मंजूर करण्यात आले आहे. वणी विधानसभेचे आमदार संजीवरेड्डी बोदकुरवार यांच्या प्रयत्नामुळे वणी विधानसभेतील चार तीर्थक्षेत्राच्या विकासासाठी ही निधी मिळाली आहेत. पर्यटन व सांस्कृतिक कार्य मंत्रालयातर्फे पर्यटन स्थळांच्या ठिकाणी पायाभूत सुविधा उपलब्ध करून देण्यासाठी प्रादेशिक पर्यटन योजनेअंतर्गत ही निधी उपलब्ध करुन देण्यात आली आहे.
वणी तालुक्यातील जगन्नाथ बाबा तीर्थक्षेत्र भांदेवाडा येथे 2 कोटी रुपयांच्या निधीतून सभागृह व इतर विकास कामे केली जाणार आहे. तसेच जैताई माता देवस्थान वणी साठी 1 कोटी, रंगनाथ स्वामी देवस्थान वणी साठी 1 कोटी रुपये व भवानी माता देवस्थान गोडगाव येथे सभागृहसाठी 1 कोटी रुपये मंजूर करण्यात आले आहे. असे या चार ठिकाणी सभागृहाचे बांधकाम करण्यासाठी एकूण 5 कोटीचा निधी आमदार संजीवरेड्डी बोदकुरवार यांनी खेचून आणला आहे.
सदर कामे सार्वजनिक बांधकाम विभाग पांढरकवडा मार्फत होणार असून चालू आर्थिक वर्षात बांधकाम सुरू होणे अपेक्षित आहे. संबंधित नियम, अटी व शर्थीच्या अधीन राहून जिल्हाधिकारी यांनी काम करून घेण्यासाठी आदेश दिले आहे. एका आर्थिक वर्षात तीर्थक्षेत्राच्या विकासासाठी एवढा मोठा निधी पहिल्यांदाच उपलब्ध झाल्यामुळे भाविकांमध्ये आनंदाचे वातावरण निर्माण झाले आहे.