शाळा क्रमांक 8 मध्ये विद्यार्थ्यांसाठी बँकेविषयी जनजागृती कार्यक्रम

पुरुषोत्तम नवघरे, वणी: सतर्कता जागरूकता अभियाना अंतर्गत युनियन बँक ऑफ इंडियाच्या शाखा वणी तर्फे स्थानिक क्रांतीज्योती सावित्रीबाई फुले नगर परिषद उच्च प्राथमिक शाळा क्रमांक 8 वणी येथे जनजागृती कार्यक्रम घेण्यात आला. या कार्यक्रमाच्या अध्यक्षस्थानी शाळेचे मुख्याध्यापक किशोर चौधरी हे होते तर मार्गदर्शक म्हणून युनियन बँकेचे शाखाप्रमुख लौकिक बायस्कर हे होते. प्रफुल्ल आयटवार व नितीन घाटे यांची या कार्यक्रमाला प्रमुख उपस्थिती होती. याप्रसंगी विद्यार्थ्यांना बँकिंग व्यवहार व नागरिकांचे अधिकार याबाबत लौकिक बायस्कर यांनी मार्गदर्शन केले. या कार्यक्रमाच्या निमित्ताने बँकेतर्फे विद्यार्थ्यांना शालेय वस्तू भेट म्हणून देण्यात आल्या. या कार्यक्रमाला शिक्षिका सुनीता जकाते व किरण जगताप या उपस्थित होत्या. कार्यक्रमाच्या यशस्वीतेसाठी शाळेतील शिक्षकांनी परिश्रम घेतले. कार्यक्रमाचे संचालन देवेंद्र खरवडे यांनी केले तर उपस्थितांचे आभार प्रदर्शन नितीन घाटे यांनी मानले.